Yenna yak yenna yas…

Seg imi n yan g willi skernin amezruy n temurt nnegh. Wid yezzrin tudert nnsen deg udrar n tmes bas ad tedder tmazirt deg uzarug. Amsawal gragh d Ammi Hro Hêddu u Hêdiddu, ussan n ugdud n Ulemghenni (Imilchil).
Y. T. Imedyazen n zik yellan ttnaghen d irumiyen s tmedyazin d izlan; is sul yedder kra degsen g tmazirt ? Is llan kra n winna yessnen timedyazin nnsen ?
Inna yak dilligh g agh zzêàen g Tzegzawt, nnan ak :

- Awa nghat sûdat is tamazirt nna, ihêyyel digs ukccîd, awerr ad awen inaqqes. Nnan asen Siyyab :
- Ad tcegh ur tccigh, assegh tadist inew ghef idrran d uxebbiz, Nnabi àermegh issen. Nnan win irumiyen:
- Idda Nnbi nnwen iggufy ka g iwriren, iggwed i nnfêd iggwed i ttêyyara, a t izlleà lhâkm, a tan ittasin aggwa ghef tadawt n mays.

Nnan asen Ssiyyab :

- Lligh s iserdan inew da ggaregh akal da bnnugh tighermatin nna zi kewn kkategh am tcibra d ibuxxa d tàajin n ifigher.

Nnan asen win irumiyen :

- Lligh ger tghbula n tmazirt, lligh da tettegh batâta izrreà lhâkm a tan yusin aggwa ghef tadawt n mays, lhâkem agh ikan Atelti d Utsaài ma Rebbi mec agh ika ka iddu d ad as t nrar. Awra han Atelti d uwrasat n zzehwa ghef nemmut, amm uynna gar lemàict.

Nnan asen Ssiyyab :

- Magh is da yettughul ad ig anselm wenna ikkan dat n lbiru a t izmmem urumy, mad is da ittughul ad ig uxnif umlil ay inselmen? yak amm djaj am lkufr ! Cuf jahnnama terra ljennt ddan ghurs lâhrar n Izîyyan, tra dduyt arumy. Cuf a Nnbi ur da k beddren adday sawlen, ghas arumiy ay ttinin am id is ten yurew.

Nnan asen digh win irumiyen :

- Da yam ttrun icirran s fad ughrum, aghrum illa g urwey, tafant tella ghef wafa, mec usigh aghrum n wafa da yis t ghusegh.

Nnan asen win Ssiyyab :

- Cufat Buàzza nna t tabàam a yimnayen s ixf ulmsid, ibbi wuzzal tasa nnes.

Y. T. Amek yella ugdud g lêhkam n urumiy ? Is tghiyyed ad agh tefked kra n ineghmisen ghef ugdud dat ukccum n urumiy?
Nnigh ak luqt lligh n irumiyen, da ittili wegdud maca da ttili tefrawt n iysan d imxezniyen ar kkaten s làemmart n tteltiyt. Dghi ur yad da kkaten mdden tafrawt. Akw ur llin iysan … tccant akw wulli timêzin. Ikkr rreba g dduniyt. Mayd yad iqqiman dghi ? Sâfi ! iàlem Rebbi thêdar a ttefnu. Ur as àeqqalegh i wegdud qbel a ed ikcem lmexzen ula irumiyen, maca umêzgh ineghmisen. Qbel ad yili urumiy, da ittili ssuq n ugdud dadex. Da itteg tafrawt seg tizi yindex gher tizi yindex, gher tizi ddex. Da itteg tafrawt meàna ur da digs ttemmenghan awd ayt lêhudjat, mqqar tannayt bu lêhudjat nnek, llan imgharen. Da ttextaren yan urgaz g teqbilt ddex yedjiwnen, ghur llan aytmas gan kradt negh Rebaa s itsaaiyen d iteltiyen, inin as hat tgit amghar n ugdud, mec ijra ka ad is tdebbert. Xtaren wa d wan, brêhen inin :
laylaha yllellah Muhând rasul llah han agdud da yetnarzâm g luqt n wayeflan. Han wenna digs yejjran ka, han wenna isawlen i wnemris negh i bu lêhudjat nnes ad ur itdûrr xs ixf nnes. Da tsewwaqt, da tejmuàt awd d wenna yenghan igma k negh tenghit igmas negh tmmejram ka, ur ghur k mayd as tsawalt ar d izrey uynnagh n krâd wussan n ugdud. Ukan igherman luqt nnagh drusen. Da ttasin irhh’alen tiyni asen ikfan; telt chur n tegrest, asin a sidi imendi, asin ka n zziyt ma sskwr walut ! asin ka …, ar ed qdûn sswalêh nnsen,ka n tdunt nnsen, ka n isufir nnsen, ka n uyenna ttemzenzan luqt nnagh, iwa zllàen g waqqiwen . Ku yan iddu g irhhâlen Llan ayt Merghad, llan ayt Atta, Ayt Hdiddu d ayt nnawahî n tmazirt. Ku yiwen yasey leàwent n warraw nnes, iàayen lmal nnes. Ixser ssuq. Ur da ttilin laswaq imci ddegh ula iàttâren, da ittegga ka aàttâr ar degs ttêssan mdden Da ttilint akw teqbilin g ugdud mqqar nnaghent, acku da kkatent tafrawt, ur degs mayd isawalen i yawd yan, walu.
Y. T. Is kkan kigan n imenghan zik ger iqbilen ?
Mqqar nnaghen ayt Hdiddu d ayt Atta da ttgen tafrawt. Maca, hatin ayt Atta degsen yan sswab axatar; inna yi baba new, ikka lhêbs ghur Mulay Lhâsan Lwwel, ndda ad as neg ahîdus g Ssegmat, inna yak itter agh ka n leàcur, ka n zzakat, inna yak ur as t nefki. Inna yak , nenna yas ad agh tegt ayyur n ttajil. Inna yak inna yasen ur inni lmexzen ad iqqim da ddegh g umerdul n Ssegmat ayyur. Inna yak , inna yasen ad awen fkegh temn iyyam n ttajil.
Inna yak ur as qbilen. Inna yak inna yasen iwa asiyat lfatihâ ! Inna yak ickkem degsen ka. Inna yak , inna yas hat ad yamêz akw ijemmaàen. Inna yak asekka rewlen itsen ijemmaàen. Inna yak ar asen iqqar, flan walut, flan walut… inna yak yamêz agh akw g lhêbs. Nddu, nddu allig d nennurzêm g Tfilalt – dinna igan Mulay Ali Crif. Iwin en ka n ihûliyen, ka n izgaren; Inna yak irzêm agh d. Inna yak iwa nddu. Inna yak da d nessa ghur ayt Atta, hatin meana nga idsen iadawen; nennagh idsen g tin Tulwin. Inna yak gin agh tizlafin n seksu . Inna yak fkin agh yat tiyni n bufqqus . Inna yak inin agh: awi merh’ba nnwen ay ayt Yaflman, awi qqimat a tssirdem, awi qqimat ad awen nkkes azzar, awi irghud awen Rebbi g awen ed irzêm. Lmexzen n luqt nnagh xs ilghwman d iysan d iserdan a ghef itterhâl . Inna yak ur tekki kan ttômubil . Inna yak llan lanfâd da ggaren snat tjeàba i welghwem .
Y. T. Aghul agh ed gher imedyazen yettenaghen zik d uromy… Ini yagh d kra degsent ad yeàmmer Rebbi taxxamt nnek.
Nnigh ak, ayenna ed ulin irumiyen g Bab-n-Wayyâd, ar asen ttinin i imeggura illan iwrin asen : Awa àawda d lmuna bal ad awen qqimegh afella n Bab-n-Wayyâd, ay udayen n dârt. Inna yas yuk g illa lxucuà n Rebbi : Awa wwet aw Hdiddu qbel ad awen issikl afus, akwen issexdam am nekkin. Awa wwet aw Hdiddu, tamazirt nnes a ghef ittemtat, ur inni yan ad awen iàawen. Iwa nitni iwêden agh d, tccan agh g tmazirt nna, ddun d Imrabêden n Mrirt ar ttasin imttinen; da ttasin iserdan sin imttinen. Agjdur ayd kkattent ist uzaghar . Ma Imrabêden nna n Izîyyan nitni ghursen teàrija d tqezdirin g iqudân, ar ttinin : Isalêh wasif Mllul iga lizar Awa sebr at ukan, Awa ka n usidd ur illi, A ta lla tzzsughur thêyûdt xf uzeggwar, A ta llan g iàfran A ta lla tteqqden awa (Acku llan g ixwba ar tend kkaten s lbarûd ). Iddegh agh umêzen nnan agh:
Iga w-Hdiddu lmital n walim
Iwa mani zzaght lli s isawal
Iga w-Hdiddu lkîd idêrn aman
Iwa mani zzaght lli s isawal
Iga w-Hdiddu lmital n walim
Idda uzwu da t yikk i leàwari
(Ar agh nqqan, ar ten neneqqa s izlan …)
Y.T. Luqt ennagh g yella imenghi s tmedyazin d izlan, yella awd es lbarûd?
Nerra yan lkumur g Unefgu. Lkumur nnagh digs yat lbertiza n Lhewwari n lqayd Hsin Umlil. Nusi yasen digs xmsa n lebyasat xmsa n imtriyuzen nnagh mi ttinin Baskis mudîl diznafsa fantkat. Nusi yasen krâd id lmurtit. Aya g useggwas n 1932. Ar issen nkkat allig iqdâ lbarud nnesen, g ur nufi yad lkurat. Nasi yasen iserdan n lbarûd bla laàdad. Mmuten, kulci nemêha ten (…)
Y.T. I tin Bougafer ?
Nnigh ak luqt nnagh, kkan agh d irumiyen Tunfiyt, kkin agh d Imilcil. Ikk agh d lkwninir Addi U-Bihi U-Terbat. Ikk agh d win Uglawu warzazt netta d ayt Umdghus. Jemàen agh d. Imiqq neghli ghef win wazazat nddu ar Bugafr, ar ghur ayt Atta ayd nsalêh. Salh’en ayt Atta g Bougafr, islêh issen Assu U Baslam. Nekwni ur nsalêh ar Hmdun d Baddu (Tinejdad).
Y. T. Tamggarut ay nnagh ?
Uhu ! Llan winna iddan s Sâhra. Ddan munen d Maàmmi. Degsen Ayt Merghad seg Izilf (Tinejdad), d yitsen Ayt Seghruchen illan g Sekkura d wiyêd g Userghin, d ka n ayt Hdiddu. Maàmmi yeghder irumiyen g Tzerhunt, ingha degsen sebàa; ddun allig zrin Tan-Tan d Gulmim, jemàen d làesker n Sbaniya. Inna yasen làesker n Sbaniya: mec tram ad tsirsem ssenâh, teqqimim ghuri, tram a tàaydem s tmazirt nnwen hat laman u ddêman. Ikrem ten ayyur. Ar tettan ar ssan. Nnan asen ssnâh ur ghurwen itqima. Inna yasen Maàmmi i ismunen nnes : wenna iran tamazirt nnes yaghul zârs, àayd at a tiqbilin, tdêfarem id allig han arumiy datagh, han aromy dtaragh ! Etccan iromiyen
Lafriqiya…Yeqqim en Maàmmi allig yemmut. (…)

Isawel ids Yeschou.

source:Mondeberbere.com